Diaspora Kultur Lernen Mazedonien

Германија добива атрактивност кај странските студенти, стана најомиленото место за студирање.

20.09.2019 Германија

Германија добива атрактивност кај странските студенти, стана најомиленото место за студирање.

Германија ја престигна Франција и стана најомиленото место за студирање меѓу земјите кои не се од англиско говорно подрачје. Дури, за повеќе од половината странски студенти, кои не се одлучуваат за студирање во САД, Велика Британија и Австралија, Германија е првиот избор. Според најновите податоци на Германската служба за академска размена (ДААД) за зимскиот семестар 2017/18 во земјата имало 375.000 студенти од странство. 83 отсто од испитаниците својот избор за Германија го образложиле со добрата шанса со германска диплома потоа да најдат работа, 74 насто сакаат диплома која ќе биде признаена и во светот, а 71 процент од нив слушнале за квалитетот на германските универзитети и затоа сакале да дојдат тука на студии. 83 отсто од испитаниците рекле дека секако и на останатите во својата земја ќе им препорачаат студирање во Германија.

Германските факултети не се само пат за кариерата, туку и пат по кој тргнале многу млади мигранти кои се затекнале во земјата. Иако статистиките не зборуваат за првобитната причина за доаѓање во земјата, видливо е дека меѓу странските студенти од дури 24.000 земји од кои доаѓаат најмногу се бегалци од Сирија, Авганистан, Ирак, Иран, Нигерија, Еритреја, Пакистан и Сомалија. Сиријците кои со бројка од 8600 дури се искачија на 6 место по бројност меѓу студентите на германските универзитети.

Пред Сиријците се наоѓаат, Италијанците со 9000 запишани студенти, па Русите со речиси 11 000, а само во незначително поголем број следуваат Австријците. На второто место се Индијците со 17300 запишани студенти а убедливо најголем број странски студенти во Германија во 2018 година биле од Кина 37.500.

Германија може да се пофали и дека во 2017 година тука биле 108.000 научници од други земји кои дошле тука да ги продолжат своите истражувања, околу 47.500 од нив се вработени во германските универзитети и високи училишта. Околу 12.000 научници од странство работат во четрите најголеми научни институти кои не се во состав на универзитетите.

„Бројот на странски научници во германските високи училишта речиси се удвои во последните 10 години“, објаснува Моника Јунгбауер-Ганс, раководител на научниот Германски центар за истражување на високи школи и наука. Таа е уверена дека тоа гарантира продолжување на врвната наука во оваа земја и нејзината поврзаност со сознанијата во целиот свет.

Секако дека и Германците одат во странство на студии или како научници, некаде да го усовршат своето знаење. Речиси една третина од студентите ги користат програмите, како што е на пример Еразмус, и за време на студиите некое време поминуваат во странство, а 145.000 од нив одлучиле да стекнат диплома во друга земја.

Во Германија студентски такси се плаќаат само во една покраина. Од 2017 година во Баден Виртемберг сите студенти од држави кои не се членки на ЕУ мора да плаќаат по 1.500 евра по семестар. Во остатокот на Германија , студирањето за сите е бесплатно.  

ДВ